"УЛААНБААТАР В2В" БИЗНЕС УУЛЗАЛТ "ЭРҮҮЛ ХҮНС-НИЙТИЙН ХООЛ" СЭДВЭЭР АМЖИЛТТАЙ ЗОХИОН БАЙГУУЛАГДЛАА
Улаанбаатар хотын худалдааны танхим, Нийгмийн эрүүл мэндийн үндэсний төв хамтран "Эрүүл хүнс-Нийтийн хоол" сэдвийн дор "Улаанбаатар B2B" бизнес уулзалт арга хэмжээг 10-р сарын 4-нд амжилттай зохион байгууллаа.
Улаанбаатар хотын худалдааны танхимын УЗ, "Премиум нексус" ХК-ийн Гүйцэтгэх захирлын Орлогч Г.Чинзориг уулзалтыг нээсэн бол Эрүүл мэндийн яам, Нийгмийн эрүүл мэндийн үндэсний төвийн захирал, ХУ-ы доктор, Дэд профессор С.Өнөрсайхан: "Хүнсний аюулгүй байдал ба Нийгмийн эрүүл мэндийн асуудал", Эрүүл мэндийн яам, Нийгмийн эрүүл мэндийн үндэсний төвийн Дарга Доктор, профессор Г.Оч: "Нийгмийн эрүүл мэндийн үндэсний лавлагаа лаборатори", Силк рөүд мэжик ХХК-ийн Захирал Я.Энхээ: "100% Био ИОД" сэдвээр илтгэл тавин оролцов.
Тус уулзалт нь Хүнсний хангамж, аюулгүй байдал үндэсний хөдөлгөөний хүрээнд хүнсний үйлдвэрлэл эрхлэгчид, ахуйн цэвэрлэгээ үйлдвэрлэгч, аяга таваг ариутгагч, цайны худалдаа эрхлэгч 10 гаруй компани эрүүл ахуйн шаардлага хангасан, шим тэжээлт бүтээгдэхүүнүүдээ эрүүл мэндийн салбарын хүнс судлаач эрдэмтэд, Тогооч нарын холбоо, мэргэжлийн тогоочид, Ресторан, зоогийн газрын холбоо, нийтийн хоолны салбарынханд танилцуулсан юм.
