БНХАУ-ын нүүрсний импорт өмнөх сарынхаас 42 хувиар буурчээ

Хоёрдугаар сард БНХАУ-ын нүүрсний импорт өмнөх сарынхаас 42 хувиар буурчээ. Харин оны эхний хоёр сарын нийлбэр дүнг авч үзвэл 51.1 сая тонн нүүрс импортолсон байгаа нь өмнөх оны мөн үеэс 3.8 хувиар өссөн дүн болж байгаа юм. 

Нэг өдөрт импортолсон хэмжээг авч үзвэл нэгдүгээр сард нэг сая тонноор хэмжигдэж, сүүлийн таван жилийн дээд цэгт хүрээд байсан бол хоёрдугаар сард өдөртөө 630 мянга болж багассан байна. Хоёрдугаар сарын дүн буурсан нь БНХАУ Австралиас нүүрс импортлохоо зогсоож, гаалийн бүрдүүлэлтийг 40 хоногоор хойшлуулсантай холбоотой гэж шинжээчид тайлбарлаж байна.

Австралийн Засгийн газар БНХАУ-ын “Huawei Technologies” компанийг тойрсон дуулиантай холбоотойгоор тус компанийн тоног, төхөөрөмжийг ашиглахыг хориглоод байгаа юм. Бээжингийн эрх баригчид үүний хариу арга хэмжээ болгон тус улсаас нүүрс худалдан авахаа зогсоож байна гэсэн таамаг ч гарч байгаа юм. Харин албан ёсны мэдэгдэлд БНХАУ-ын тал гаалийн үйл ажиллагаа хэвийн явагдаж байгаа, байгаль орчны стандартыг чангаруулж байгаатай холбоотойгоор хяналт нэмэгдсэн гэсэн тайлбар өгч байна.

БНХАУ нүүрсний импортын бодлогоороо дамжуулж, дотоодын зах зээлд зохицуулалт хийж байгаа гэдгийг шинжээчид мөн онцолж байна. Тухайлбал, дотоодын нийлүүлэгчдээ дэмжих үүднээс нүүрсний импортыг хязгаарлаж байна гэж үзэж байгаа юм.

Импортын дүн буурсан, уурхайнуудад тавих чанар, аюулгүй ажиллагааны шаардлага өндөрссөн зэрэг шалтгааны улмаас БНХАУ-д нүүрсний спот ханш өнгөрсөн оны 11 дүгээр сараас хойших дээд цэгт хүрч өсөөд байна.