Австралийн Сангийн сайд Жош Фрайденберг “БНХАУ, Австралийн хоорондын худалдаанд ноцтой асуудал үүсээгүй” гэсэн байна

БНХАУ Австралийн нүүрсний импортод тавьсан хоригоо сунгахаар болсон гэсэн мэдээг Австралийн Засгийн газар няцаалаа. Австралийн Сангийн сайд Жош Фрайденберг хэт яаран дүгнэлт хийх хэрэггүйг анхааруулсан байна. Тэрбээр “Дальян тэргүүтэй БНХАУ-ын боомтуудад Австралиас ирсэн нүүрсийг нэвтрүүлэхгүй байгаа” гэсэн мэдээллийг баталгаажуулаагүй аж.

Мөн “БНХАУ, Австралийн хоорондын худалдаанд ноцтой асуудал үүсээгүй” гэсэн байна. БНХАУ-ын албаныхан хоёрдугаар сарын 1-ний өдрөөс Дальяны боомтоор Австралиас ирсэн нүүрсийг нэвтрүүлэхээ зогсоосон, мөн хориг хэрэгжих хугацааг 40 хоногоор сунгасан гэсэн мэдээлэл цацагдсан юм. Баталгаатай эсэх нь тодорхойгүй энэ мэдээллийг зарим шинжээч БНХАУ-­ын харилцаа холбооны салбарын тэргүүлэх компани Huawei-ийг тойрсон дуулиантай холбон тайлбарлаж байгаа юм.

Австрали улс 5G сүлжээний аюулгүй байдлаа хангахын тулд өнгөрсөн онд Huawei-ийн эсрэг хориг тавьсан бөгөөд ийм алхам хийж байгаа улсуудад хандан БНХАУ-ын тал анхааруулга өгч байсан аж. БНХАУ-ын Гадаад харилцааны яамны хэвлэлийн төлөөлөгч байгаль орчныг хамгаалах зорилгоор нүүрсний импортод хяналт тавьж байгаа гэж онцолсон байна.

Харин Австралийг зориудаар сонгож хориг тавьж байгаа гэх мэдээлэлд албан ёсны тайлбар өгөөгүй юм. Австралийн Засгийн газар нүүрсний импортын хориг нь Huawei-тэй хамааралгүй гэсэн байр суурь илэрхийлж байна. Түүнчлэн БНХАУ-ын нүүрсний импортын хориг зөвхөн Австралийг чиглэж байгаа юм биш гэсэн тайлбар өгч байна.

Шинэ мэдээ