Дэлхийн стандартын дугуйн зогсоол "UBIKE" төсөлд "Петровис" ХХК хамтран ажиллана

Түрээсийн дугуйн үйлчилгээ нь автомашины түгжрэл, агаарын бохирдлын эсрэг хийх үр дүнтэй алхам

 төдийгүй иргэдийн эрүүл мэндийг сайжруулахад чиглэсэн бодит ажил болох нь дэлхийн олон хотын туршлагаар батлагдсаар байна. Өнөөдрийн байдлаар дэлхийн 600 гаруй хотод түрээсийн дугуйн үйлчилгээ амжилттай хэрэгжиж байгаа бөгөөд  энэхүү хямд, ухаалаг тээврийн хэрэгсэл их хотын иргэдийн үйлчлүүлэх дуртай тээврийн хэрэгсэл болсоор байгаа юм.

 

Тиймээс Нийслэлийн Засаг дарга бөгөөд Улаанбаатар хотын Захирагч С.Батболд 2017 оны гуравдугаар сард “Төр хувийн хэвшлийн түншлэл”-ийн хүрээнд түрээсийн дугуйн “UBIKE” төслийг хэрэгжүүлэхээр сонгон шалгаруулалт зарласан. Тэгвэл өнөөдөр “Ubike” төслийн сонгон шалгаруулалтын дүн гарч Нийслэлийн Засаг даргын Тамгын газар төсөл хэрэгжүүлэгч байгууллагыг зарлаж, хамтран ажиллах гэрээ байгууллаа.

Сонгон шалгаруулалтад:

  1. “Никель ганбаа” ХХК,
  2. “Петровис” ХХК,
  3. Хас банктай хамтарсан консерциум ялалт байгуулж, Улаанбаатар хотын Түрээсийн дугуйн “UBIKE” төслийг хэрэгжүүлэхээр гэрээ байгуулж байна.
 
 

“Никель Ганбаа” ХХК, “Петровис” ХХК, Хас банкны хамтарсан консерциум нь “UBIKE” төслийг 3 үе шаттай хэрэгжүүлнэ.

  • 2018-2020 онд 150 зогсоолтой 2,000 ширхэг ундаг дугуй,
  • 2021-2026 онд 250  зогсоолтой 2,500 ширхэг цахилгаан унадаг дугуй, 
  • 2027-2033 онд 5,000 ширхэг бүрэн цахилгаан дугуйг үйлчилгээнд нэвтрүүлэх төлөвлөгөөтөй ажиллаж байгаа юм.

“Никель Ганбаа” ХХК-ийн гүйцэтгэх захирал Г.Дашням “Төслийн хүрээнд эхний ээлжинд 43 байршилд түрээсийн 500 дугуй байршуулна. Түрээсийн дугуйн төлбөр 30 минутад 500, нэг цагт 800 төгрөг байх юм. 

 
 

Иргэд ХасБанкны “Qpay” үйлчилгээг ашиглаж, гар утасаараа дугуйны суудлын дор байрлах QR кодыг уншуулан төлбөр төлснөөр дугуйны түгжээ автоматаар тайлагдана. 

Түүнчлэн унадаг дугуйг хулгайд алдагдахаас сэргийлэх зорилгоор тус бүрт нь GPS төхөөрөмж суурилуулсан байна.

 “Никель Ганбаа” компани нэг унадаг дугуйг GPS төхөөрөмж, ухаалаг цоож, QR код зэргээр тоноглоход нийт 400 мянган төгрөг зарцуулсан бөгөөд цаашдаа засвар, үйлчилгээг бүрэн хариуцна” гэлээ

Мөн энэхүү төсөлд ашиглагдах дугуйнуудын хувьд дэлхийн стандартын дагуу Монгол Улсад үйлдвэрлэсэн, төлбөр, тооцоо болон хяналтын бүрэн ухаалаг системтэй байх бөгөөд  иргэдийн аюулгүй байдлыг бүрэн хангасан байх болно гэдгийг төсөл хэрэгжүүлэгч байгууллагууд онцлов. 2018-2020 онд хэрэгжих төслийн хугацаанд байгуулах 150 зогсоолын  2 нь анхан шатны завсар үйлчилгээ хийх төв зогсоолууд байх юм байна. 

Шинэ мэдээ