Алт олборлогчид АМНАТ-ийг 5 хувь болгон өсгөхгүй байхыг хүсжээ

Засгийн газар “Алт-2” үндэсний хөтөлбөр хэрэгжүүлэх шийдвэр гарган, 2020 он хүртэл үргэлжлүүлэх болсон юм.

Өнгөрсөн сарын 31-ний өдрийн байдлаар Монгол банк 734.4 кг алт худалдан авчээ.  Оны эхнээс нийт 2,301.8 кг алт худалдан авсан нь өмнөх оны мөн үеэс 48.3 кг-аар илүү байгааг хөтөлбөрийн үр дүн гарч эхэллээ гэж дүгнэдэг.

Лондонгийн үнэт металлын захын алтны ханшаар 1 грамм алт худалдан авах Монгол банкны үнэ 103,206 төгрөг /2018.04.16/ байна.

УУХҮ-ийн сайд алтны салбарын төлөөлөлтэй уулзан, салбарын татварын эрх зүйн орчны талаар санал солилцсон. АМНАТ ирэх оны эхний өдрөөс эхлэн 5 хувь болж өснө.

Одоо энэ төлбөр 2.5 хувь байгаа юм. Иймд алт олборлогчид цаашид 2.5 хувь хэвээр хадгалах хүсэлт тавьсан юм. Одоогоор Монгол банк, Сангийн яам энэ хүсэлтэд албан ёсны хариу өгөөгүй байна. Бусад улсуудтай харьцуулахад алтанд ногдуулдаг АМНАТ манай улсад харьцангуй бага байсан тул 5 хувь болгон өсгөх шийдвэр гаргасан юм.

“Үндэсний аж ахуйн нэгжүүд хөрөнгө санхүүтэй болж хөл дээрээ босох, манай эдийн засгийн суурь бүтцийг барих үндэс нь алт юм. Валют болдог зүйл бол алт. Бид  хариуцлагатай уул уурхайг хөгжүүлж нийгмийн ойлголтыг эерүүлнэ. Дэлхий нийт бүгдээрээ л алтны үйлдвэрлэлээ дэмжээд, алтаа нөөцлөх замаар мөнгөн тэмдэгтийн ханшаа барьдаг, эдийн засгаа тогтвортой байлгадаг.

Манай улс өнгөрсөн онд  20 тонн алтыг Төвбанкинд нийлүүлснийг би чамлалтай гэж ойлгож байгаа. Би жилдээ 50 тонн алтыг Төвбанкиндаа тушаадаг, түүнийгээ цэвэршүүлдэг, цэвэршүүлсэн алтаа Төвбанкиндаа нөөцөлдөг байх хэрэгтэй. Тэгснээр эдийн засгийн хувьд хүчирхэгжинэ. Төгрөгийн ханш яагаад савладаг, ам.долларын эсрэг яагаад сулардаг нь алтны нөөцтэй холбоотой. Монгол Улсын иргэн бүрийн амьдрал, та бидний түрийвчтэй холбоотой асуудал. Тиймээс яамны зүгээс “Алт” хөтөлбөрийг бүрэн дэмжинэ.

Гэхдээ хариуцлагатай, сахилга баттай, нөхөн сэргээлтээ хийдэг уул уурхайн компаниудаа бид дэмжин ажиллана. Эсрэгээрээ нөхөн сэргээлт хийдэггүй, орон нутгийг дэмждэггүй, орлогоо нуун дарагдуулдаг аж ахуйн нэгжийг дэмжихгүй. Тусгай зөвшөөрлийг нь цуцлуулах, үйл ажиллагааг нь зогсоох хүртэлх арга хэмжээг ойрын хугацаанд авна” гэж УУХҮ-ийн сайд Д.Сумъяабазар өчигдөр болсон хэвлэлийн хурлын үеэр байр сууриа илэрхийлсэн юм.

“Алт-2 үндэсний” хөтөлбөрийн хүрээнд хийсэн бусад ажлууд:        

  • Эрдэс баялгийн мэргэжлийн зөвлөлийг /ЭБМЗ/ УУХҮ-ийн сайд 2018 оны өнгөрсөн сард шинэчлэн байгуулжээ. 2018 оны эхний улиралд ЭБМЗ-ийн хайгуулын ажлын үр дүнг хэлэлцэх салбар зөвлөлийн хоёр удаагийн хуралдаанаар алтны 12 шороон ордын тайланг хэлэлцэж хүлээн авсан байна.
  • Хөгжлийн банкнаас энэ оны эхний улирлын байдлаар алт олборлогч 3 компанийн 25.8 тэрбум төгрөгийн зээл хүссэн хүсэлтийг судалж байна.
  • Алтны хэтийн төлөв бүхий бүс, нутгийн хэмжээнд улсын төсвийн хөрөнгөөр  Монгол орны алтны хэтийн төлөвийг үнэлэх, алтны эрэл-үнэлгээний сэдэвчилсэн судалгааны  ажлыг Засгийн газрын үйл ажиллагааны хөтөлбөр болон Монгол Улсын эдийн засаг, нийгмийг хөгжүүлэх үндсэн чиглэл, жил бүрийн улсын төсвийн төсөлд тусгуулсан. Энэ ажлыг 2017-2019 онд Монгол орны төв, зүүн бүсийн хэмжээнд гүйцэтгэхээр “Гео Тех Импекс” ХХК шалгаран төслийг хэрэгжүүлэн ажилласан бөгөөд 2017 онд төслийн судалгааны ажилд 1,5 тэрбум төгрөг зарцуулсан байна.
1 | 1 фото
 

Шинэ мэдээ