Аж үйлдвэрийн салбарын үйлдвэрлэл 1.1 их наяд төгрөгөөр өсчээ

Зураг

Үндэсний статистикийн хорооноос танилцуулсан Монгол Улсын нийгэм, эдийн засгийн эхний таван сарын байдлаар аж үйлдвэрийн  салбарын нийт үйлдвэрлэл 6 их наяд төгрөгт хүрч өмнөх оны мөн үеэр 1.1 их наяд төгрөгөөр өсөөд буй дүн мэдээ гараад байна.
Аж үйлдвэрийн салбарын нийт үйлдвэрлэл өсөхөд уул уурхай, олборлох салбарын нийт үйлдвэрлэл 827.1 тэрбум төгрөгөөр буюу 23.7 хувиар өссөн нь голлон нөлөөлжээ. Үүнээс нүүрс олборлолт 511.2 тэрбум төгрөг буюу 48 хуиар, металлын хүдэр олборлолт 252.0 тэрбум төгрөгөөр буюу 12.6 хувиар тус тус өссөн байна. Энэ оны эхний 5 сард алт, зэсийн баяжмал, цайрын баяжмал, төмрийн хүдэр, буталмал чулуу зэрэг уул уурхайн олборлох үйлдвэрийн гол нэр төрлийн бүтээгдэхүүний олборлолт өмнөх оны мөн үеийнхээс 2.5-39.0 хувиар, боловсруулах аж үйлдвэрийн салбарт шар айраг, малын тэжээл, самнасан ноолуур, вакуум цонх, хаалга, зүсмэл материал, архи, ноолууран сүлжмэл эдлэл, хиаман төрлийн бүтээгдэхүүн, банш, бууз зэрэг хүнсний гол нэр төрлийн бүтээгдэхүүний үйлдвэрлэл 6.5-27.8 хувиар өсчээ.
Статистик мэдээгээр ямааны кг цагаан ноолуурын үнэ Дорнод аймагт хамгийн бага буюу 50.0 мянган төгрөгийн үнэтэй байгаа бол Баянхонгор аймагт хамгийн өндөр буюу 113.0 мянган төгрөг байна.
Өнгөрсөн 5-р сард хэрэглээний бараа, үйлчилгээний үнэ улсын хэмжээнд өмнөх сарынхаас 0.6 хувь, өмнөх оны эцсээс 4.5 хувь, өмнөх оны мөн үеэс 6.1 хувиар өссөн үзүүлэлттэй гараад байна. Үүнд хүнсний бараа, ундаа, усны бүлэг дүнгээрээ 1.5 хувиар өссөн нь голлон нөлөөлжээ. Харин нийслэл хотод хэрэглээний бараа, үйлчилгээний үнэ өмнөх оны мөн үеэс 6.6 хувиар өсөөд байгаад хүнсний бараа, ундаа, усны бүлгийн үнэ 7.0, орон сууц, ус, цахилгаан, түлшний бүлгийн үнэ дүнгээрээ 19.6, согтууруулах ундаа, тамхины бүлгийн үнэ дүнгээрээ 8.4, тээврийн бүлгийн үнэ 4.4 хувиар өссөн нь голлож нөлөөлжээ. Өнгөрсөн саруудад тамхины татвар нэмэгдсэн, шатахууны үнэд өөрчлөлт орсон зэрэг нь хэрэглээний бараа, үйлчилгээний үнэ өсөхөд нөлөөлсөн гэж статистикчид онцолж байв.
Банк, санхүүгийн салбарын статистик мэдээллээр мөнгөний нийлүүлэлт (M2) тавдугаар сарын эцэст 17.0 их наяд төгрөг болсон нь өмнөх сараас 801.6 тэрбум төгрөг буюу 4.9 хувь, өмнөх оны мөн үеэс 4.1 их наяд төгрөг буюу 31.2 хувиар тус тус өссөн дүнтэй гарчээ. Харин гүйлгээнд гаргасан бэлэн мөнгө тавдугаар сарын эцэст 935.9 тэрбум төгрөг болж, өмнөх сараас 1.7 тэрбум төгрөгөөр буурч, өмнөх оны мөн үеэс 60.5 тэрбум төгрөгөөр өссөн байна. Хугацаа хэтэрсэн зээлийн өрийн үлдэгдэл өмнөх оны мөн үеийнхээс 10.5 тэрбум төгрөгөөр өсчээ.
Цаг агаарын үзэгдлийн талаар гарсан мэдээгээр энэ оны тавдугаар сард хамгийн их хур тунадас Хөвсгөл аймгийн Цагаан-үүр суманд 54.5 мм-т хүрсэн байна. Агаарын үнэмлэхүй бага температур Ховд аймгийн Дууь сумын нутгаар -15.7 хэмд хүрлээ. Салхины үнэмлэхүй их хурд Баян-Өлгий аймгийн Өлгий суманд түр зуур 32 м/сек-д хүрчээ. Хамгийн их халуун өнгөрсөн тавдугаар сарын 2 дахь үед байв. Энэ сүүлийн 57 жил ажиглагдсан хамгийн их халуун байсныг Цаг уур, орчны шинжилгээний газраас мэдээлжээ.

Шинэ мэдээ